 الرقــــاصـة والطبلة
أحبتي
هذه القصيدة أعجبتني واحببت نقلها لكم..
على كاس الخمر والبست والرقاصه والطبله
هنا تلقى العرب وهناك تلقى القدس مضيومـه
على هزة ردوف وكتف ذيك الساقطة الخبله
على قلة حيا وضحكة هزل من مومس بومـه
على ضرب الكؤوس بصحة الفوضى والشله
هنا تلقى العرب تنسى وتسلب روح معدومـه
نسينا مريم العذرا وعيسى وهزة النخله
نسينا يا زمن منهو صلاح الدين وقرومـــه
نسينا المسجد الأقصى نسينا أول القبله
نسينا يا حياة الذل دين شقوا هدومـــــه
نسينا محمد الدرة وذبحة سارة الطفله
نسينا كم رضيع فارق امه ماكمل يومــــه
نسينا صرخة الأطفال وعرض أنهتك كله
نسينا كم عجوز وأم عليها الدار مهدومـــه
نسينا أرضنا دم ودموع وعار مبتلـه
نسينا هالقبور اللي تضم أجساد مفرومـــه
نسينا وإن نسينا ما نسينا الدرب وندله
ولكنا عشقنا الخوف عشق طول النومـــه
يفوح من القهر صدر البحر والضيق والعله
يهل من العتب جرح سكن في عين ديمومـه
رحى الأيام تطحن في ضلوع الدين والمله
وحنا أرقابنا بانت بخط الذل موسـومـــه
ملينا الأرض بالكثرة ولكن نخضع لقلـه
سكن فينا خراب وخوف وحق ضاعت علومه
تنادينا الجهات الأربعه القدس محتلـه
ولـكن لاحيـاة لمن تنـادي تطلب القومـه
الشاعر
جابر هايف العتيبي |