المؤشر للأسهم السعودية - عرض مشاركة واحدة

عايشه بصمت · 03-04-2008, 07:36 PM

اليوم شعوري غريب !! روعه كله ذكرى وايااامـ ... يالله
نفس المكان .. نفس كل شي
في نفس المكان .. في غير الزمان .. مرتني الذكرى

قررت اليوم أزور الروضه اللي كنت أدرس فيها وكان قرار بالنسبه لي جرئ
اني اعيش ايام عشتها من 16 سنــه تقريباً

وانا بالطريق افكر وبصراحه كنت شوي خايفه من وشو خايفه مدري
يمكن كنت خايفه اني اشوف نفسي وانا صغيره

وصلتـ ...

وانا متوجهه للباب قلبي زاد نبضه
دخلت .. يالله اطالع يمين
ضحكت
هذا المكان اللي كنت اجلس فيه اول السنه ابكي فيه حتى يروح صوتي من الصياح
ابي بابا .. ابي ماما
بروح للبيت
ههههههههههههههههههه
وكانت معلمة اسمها فاطمه الله يعظم اجرها تصبر علي صبر مو طبيعي
تمر ايام طول الدوام وانا جالسه اصيح بهالمكان وارفض ادخل
وكانت تجلس معي طول هالوقت

معقوله انا كنت اسوي كذا !!

نفس زوجة الحارس ماتغيرت هي .. هي
بس كبرت شوي بالسـنّ
شفتها سلمت على راسها
كم رعتني وانا صغيره
مااقدر اوصف بصراحه
روعه .. مشاعري ..روعه

دخلت داخل

يالله نفس المكان .. كل شي مثل ماهو ماتغير
كل شي .. كل شي

نفس الركن اللي كنت العب فيه مثل ماهو
تذكرت صديقاتي اللي كنت العب معهم بنفس المكان
وينهم الحين
وحده تزوجت وعندها ولد
والثانيه تكمل دراستها
سبحان الله غريبة الحياه .. غريبه

دخلت الصف .. ليتني مادخلته
ههههههههههههه
تذكرت والله كأني اشوف نفسي
ضحكت يوم شفت المكان اللي كنت اجلس فيه
كرسي صغنون !!

جلست فيه !!!
جاني شعور ان اللي كانت تتدرس انها مو انا وانه حلم
ياربي .. شعور يجنن

الالواان والرسم
ومعجون الصلصال والمقص والأوراق
والمشاغبه والضحكه الحلوه
والهواش على الكراس
الله .. الله

رحت لمطبخ الأطفال
تذكرت الطبخه اللي سويناها

سلطه
طماطم + خيـاروياروحي عالتقطيع !!
كنت اقطع واذا فيه قطعه ماعجبني شكلها احطها بفم صديقتي
متفقين انا وهي اذا خرب شي هي تاكله
علشان نطلع احسن طبخه
مسكينه ذاك اليوم اكلت خيار صار لونها اخضر من كثر ماكلت
ههههههههههههههههههه
تضحيه بقوه علشان نصير شطـّـار
ياربي ما احلاها من ايااام

>> تراها في المتوسط اكلتني جزر تردها لي

شفت المكان اللي كان يصفقني فيه ولد
يومياً لازم يزين خدي بكف من يدينه
وكنت اسكت ما اعلم عليه خايفه اذا علمت يدبل الكف كفوف
ههههههههههههههههه

والسبب اني ما العب معه والعب مع غيره
طيب ما ابي غصب
هههههههههههه

الله يذكره بالخير

دخلت للمديره
شفتها وكان لقاء ملئ بالدموع
خانقتني العبره من يوم وصلت
بس شفتها ماتحملت
ههههههههههههههه
كبرت شوي
قالتلي شوفي اخر مره تجين .. خلاص كبرتينا
اذا شفتك احس اني عجوز
الله يخليها لأولادها

قالت عندي لك مفاجاءه
يوم شفتها طلعت صورتي معلقتها بمكتبها
ضحكت يوم شفت شكلي

سلمت على كل معلماتي
وكان شعور فوق الوصف

مااطول عليكم .. طلعت
ركبت السياره وفي الطريق
افكر
نفس المشوار ... ولكن
غير الزمان . . غير التفكير .. غير العقل .. غير الإهتمامات
غير النفس .. غير وغير وغير

ما احــلى الطفوله غـير

أيقنت أن الزمان مايتغير
وان النــااس هي ال تتغير
فـلولا البشــر لـبقيت الأرض هي الأرض

يالله صرت كبيره .. نظرتي تغيرت
بعد ماكان اهتماامي اللعب والأكل والنوم

ياروعة الطفوله
لاحسااب ولا عقاب ولا مسؤليه امام الله عزوجــل

سبحـاان الله .. الأطفال هم أحباب الله
وزينة الحياة الدنيا

كل واحد يفكر يوم كان طفل
بيقول معقوله انا كنت كذا واسوي كذا واقول كذا !!

نقلــت لكم جزء بسيط من شعوري
نصيحه .. اللي يبي يشعر بشعور رائع
يروح لأي مكان فيه ذكريات للطفــوله
صدقونــي .. بيكون غير

ملاحظه :
رجعت للبيت قلت لـ أمــي فيه جهاز ادخل فيه يرجعني صغيره
طبعاً ماردت علي

هههههههههههههههه