قولوا لأبو متعب ترى الشعب مقهور
ياخادم البيتين نمسك عصاها
ضاعت فلوس الناس مع كل هامور
مثلك يعرف البير ويعرف غطاها
من سي لسوى بين عاثر ومعثور
سهمك وهو سهمك رموه بخلاها
كيف اشكي العله على كل دكتور
والطب عندك انت تعرف دواها
ما خافوا الله خالق النار والنور
حتى الأرامل شاركوها بعشاها
ياقلبي الي فيه نيران وحرور
ضاقت علي دنياي سكر فضاها
سوقك بلون الدم بااسباب مغرور
يضغط على سابك وكسر يداها
في عشر اواخر نرجي الذنب مغفور
قاموا علينا قومة ماوراها
وإعمار صارت دمها اليوم منثور
خاب الرجاء بإعمار والي رجاها
ياما بنينا فوقها أبراج وقصور
راحت سدى والسوق دحدر معاها
كم شاب قال أبغى تزوج من الحور
أفلس وبيره جف ماشاف ماها
كم راعي اسره اصبح الصبح مفقور
العيد بكره وأسرته ماكساها
قمت أتفكر وادرس الراي والشور
قلت أزبن لصقر العروبه ذراها
كلمه تجي من عنده اليوم مسرور
والسوق يرجع عشب يروي ضماها
يادرعنا لاصار بالكون عاصور
كم صرخه للناس تسمع صداها
يالحر يابن الحر والحر مخبور
قاد الحراره الشامخه في سماها
مايلحقك ياسيدي شك وقصور
لا كن رساله يوصلك محتواها
انك ابونا والرجاء فيك موفور
عدلك شمل كل الديار وغشاها
جوني يعزوني على السوق ماجور
قلت البقى بالشيخ يطفي لضاها
ويرد لون السوق عشبي ويخور
مثل علم دار السعود وصفاها
خيرك عميم وشاكر الناس مشكور
ومزن الحيا عم البلاد وسقاها
انت الرجا بعد الولي تدفع الجور
واسلم عساك ادوم تحمي حماها