 يقول .........
حمد السعيد في قصيده
اتمنى انها تعجبكم
مات الجمر وقلوب الاحباب حيه ... والموت لا ماتت قلـوب الحبايـب
ياشيشتي لو فيك ذنب وخطيه ... معاك احس اني عن النـاس غايـب
العام كانوا لي من الاصحاب ميه ... وقت الرخا لكن جفـوا بالنوايـب
لاهنت يا قلبن شكى من خويه ... كم راس من طعنات الاصحاب شايب
مرات اقول ان الخبل يـا هينـه ... و لقيتهـم يشكـون ظلـم القرايـب
ومرات اقول النذل لا رحم حيه ... واثر النذل في بعض الاوقات صايب
يا نفس شيليها على السامريه ... شيلة طـرب ماعـاد فيهـا طلايـب
وش لي بتنبيه القلوب العميه ... وحنـا فـي هالدنيـا دروب وركايـب
ابتغـزل فـي هذيـك البنيـه ... بنـت تفـل القلـب فـل الذوايـب
كم بعثرتني واجمعتني هنيه ... بنفس المكـان اللـي جمعنـا غرايـب
يا ضعفها معهم وعندي قويـه ... منهـا غـدا ثلثيـن قلبـي خرايـب
مرباعها بين العيون الشقيـه ... ومقيضهـا بيـن الجـروح العطايـب
ما اقول يذبح زينها بس هيه ... تلفت لهـا قلـب عـن الحـب تايـب
ولا اقول مغروره ولا هي خليه ... فيهـا دلـع طفـل تبنـاه شايـب
جمال نجـد وفتنـة حايليـه ... وش جمـع الثنتيـن فيهـا عجايـب
اليا اقبلت بين احسنات وسيه ... ياكثر ذنبـي بيـن طيـب وغصايـب
واليا ادبرت في دمعتين نديه ... قلب معاها وقلب فـي الصـدر ذايـب
راح العمر ما بين روحه وجيه ... ياكثـر غلطاتـي ولانـي بهايـب
شب الجمر مادام الاشواق حيه ... وطف العتب والعمر ضحك ونصايب |