قالوا تزوج

قالــــوا لي أهـــــــلي تزوج
بــــالفقـــــــــر لا لا تحجج
مــا ضـــاقت الا وتـفــــرج
شـــــيبت مــــــانتب صغير
قـلت ابحــثوا عــن بـــنية
حلـــــــــوة لطيــــــفة ذكية
قـالـــوا لقيـــــنا رقــــــية
زيـــــنة وابــــــــــوها فقير
جيت الأبــو قلــت خطِيّب
يـــــومه درى زاد تــــــرحيب
وقدم لي الشــاي والطيب
من عقب كــــــاس العصــير
وقــــال أي البـــــــــــــنات
ثيــــــب تـــبي أو فــــــــــتاة
يتيـــــمة ولا بــحمـــــــاة
كــــل لـــــها مهــــــر غــير
وقـلت ودي رقـــــــــــــــية
قـــــــال المهر ألــــف مــــية
وهذي تــــراها شـــــــــوية
مــع الـــذهب والســــــريـــر
وقلت يـــاعــم غـــــــــالي
ياعم أنا شــــــــــوي مــــالي
ودي ببنت الحــــــــــــلالي
وأنت بحـــــــــــــالي خبــير
قال انقلــع لا أشــــــوفــك
لياك تشـــــــرح ظـــروفــك
اذلف وجـمِــع الــوفــــــك
عســــاك ســـــــــد المصــير
ورحت لإمـــي حـــــــزيني
يوم ســــــألت ويش فـــيني
قلت الأبــــو مــــا يــبيني
يبي قــــــــــــــروش كثــير
قالت خـــبل لايهــــــمك
حـرمتك عندي وانــــا امــك
بنت جمــــيلــــة تلــــمك
وابـــــــــوها تــــاجــر كبير
بــاكــــر تســـــير عـليهم
من قـــــبل احــــدٍ يــجيهم
هــــذولا كــلٍ يـبــيـــــهم
حيث ان ابـــــــــوها شــهير
لبست لي احســـن ثــــياب
ورشيت نفســي بالاطــــياب
وجيت ووقفــــت بالـــباب
واقـــول يــــالـله خـــــــير
دخلت وكلمت ابــــــــــوها
ونادى امـــها مـــع اخــــوهــا
وقال روحــــــوا اسألــــوها
هي ودهــــــــا بــالعشـــــير
يــــــوم رجعــــوا قالوا ايه
تــــــرى البنــــــــــــية تبيه
ولها شــــــــــــــروط عليه
وان طـــــــــاع كلـــش يصير
مــــها تبي كــــــــل صيف
ســــــفرة لـــــديــرة جنيف
وقصر كبــــــــــير نظيف
مفــــــــــــروش زل وحــرير
وايضا تبي خـــــــــــــادمه
حيث انــــــــها نــــــاعــمه
صرخت يــــــــــــا ظـــالمه
هي تحســــــــــب اني وزيـــر
ورحت غضــــــــــبان لأمي
خـــــــافت ودلـــــت تســمي
شكيت حـــــــــزنـي وهمي
وقلت اخطــــــبي لي عبــير
قــــالت مشـــــــينا لاهلها
عســــــــــاك تصبح بعلهــا
مهيب خـــبلـــــة وبلــــها
تـــقــــنـــع بــــشي يســير
جيت الأبو صـــار يضـرس
وقـــال آسف البنــت تــدرس
ما ودها الحـــــــين تعــرس
وســـــــــن البنـــــيه صغير
جاوبت بنتك كبــــــــيرة
العـــــــــــــــام صارت مديرة
حرام تقعد اســـــــــــــيرة
باســــــــــــباب شيء حقير
يومي فضحــــــــــته وورط
قــــــــــــال اص ماريد خرط
يالله موافق بشـــــــــــرط
مـــا اســـــــــــحبه لو تطير
شرطي تراه المعــــــــــــاش
في اخـــــــــــــر الشهر كاش
مــــــانيب اربي بــــــلاش
لامثــــــــــــــــالكم يالغرير
طـــلعت مــــن بيــــــتهم
زعـــــــــــــــــلٍ وخليـــتهم
يــــالــــيت مـــاجيتــــهم
ما عــــند ابـــــــوها ضمير
وقلت ســــــــــدت دروبــي
يمه ابــــبقى عــــــــــزوبي
أكوي شــــــماغي وثــــوبي
ماعـــــاد ابي لي خــــــــشير
قالت وش الــــلي تـقــــول
اكـــــــــــيد انت مهـــــــبول
اصـــــبر لعلك تــــــــنول
الـــــله وانــــا امــك قـــدير
يرزقك بنت هــــــــــنوف
فيــــها جمـــــيل الوصــوف
معها الســــــعادة تشــــوف
وتعيـــــــــش معــــها قـرير
عــــــــــندي بنية حــلال
عـــقــــــــل وديــن وجـمال
ماهم بـــــراعـــين مـــــال
وابوهــــــا شـــــــيخ ضـرير
جيت الأبو قلت يــاعـــــم
يومه ســـــمعني نــطق ســم
وقلت يــاعــــم تســــــــلم
جيـــــتــــك أبخطب غديــر
قال انتظر يوم ســــابــــع
وارد لــــــــــك رد قــــاطـــع
إن كان ما فيه مــــــــانـــع
يجـــــيك مـــني بشــــــــير
وراح يــــوم ويومــــــــــين
ثــم اتصل يــــــوم الاثنــين
قلت الخبر قال لي زيـــــن
تعـــــــال عقب الاخـــــــير
وجيت وادخلني الـــــــــدار
وقلت يـاعــم وش صـــــــــار
قال امدحوكم لي اخــــــيار
يــــوم جيتهم مســــتشــير
وقلت هــــذي الفلــــــــوس
وودي اشــــــــــــوف العـــروس
من اجل تهـدى النفـــــوس
رســــــــولــــــنا بذا يشــير
وقـــال وش قـــــــلت ودك
وقف هـــــــنا عند حـــدك
مافيه عـــقــل يـــــــردك
هي شـــــــــــــاة والا بعــير
بنتي أبـد ما تشــــــــــاف
من قــــــبل يــــوم الزفــاف
ومادامنا في خــــــــــــلاف
تــــــــــــــــراي أنا مستخـير
رجعت ما شــــــوف دربــي
مهمـــــــوم يـــوجعني قلبي
واقــــول وفـــــق يــاربــي
تـــــــراي بك مســــــــتجير
والحــمـــدلــــله لقـــــيت
رجــــال من خــــــوش بيت
ديــــن وعــقــــــل وصـيت
وبحــــــــــــال مثلــي بصير
يشــري قــــروم الــرجـــال
مـــاوده بــــــــــزود مــال
وده بــــولــــــد الحــــلال
متـــــــــــعلم ومســـــــتنير
خطبت مـــنه وعـــطــاني
وحققت كـــــــل الأمــــــاني
واصبحت قــانــع وهــــاني
وعشــــــت معــــــــــها أمير
والحــمد لـــله خــــــلاص
عندي سـكن ملـــــك خــاص
وعـــيال يملـــــون بـــاص
وعــــايش بصحـــــة وخـير

قال العريس انا الذي فـي سعـاده
ماني عزوبي ضايق الصدر مهموم
مبسوط من مثلي قعد عنـد غـاده
مهوب مثل اللي لحاله تقـل بـوم
في كل ليله حاضـنٍ لـه وسـاده
وانا مع المزيون في غرفةالنـوم
أنا اشهد انه عايـشٍ فـي قـراده
يروح عمـره مـا تهنـى ولايـوم
الى دخـل للبيـت يبلـش بـزاده
يقعد يقطّع لـه طمـاطٍ معـه ثـوم
ولا قضى عقب العصر من عـداده
والحوض من كثر المواعين مزحوم
والى غسلهـن ثـم فـك السـداده
دلى يغسل لـه سراويـل وهـدوم
وان ماطبـخ روّح لمطعـم حمـاده
والا قعد في منزله واعلن الصـوم
وان جاه ضيفٍ باغيٍ لـه رفـاده
يروح يشري رز وايـدام ولحـوم
ما يعرف الشمبو وراسـه عـراده
وشمغه من الكواي مليانـه رقـوم
ما يكنس الفرشـه ويلقـط بـداده
امـا بقايـا رز او خبـز معـروم
عنـده صراصيـرٍ بحاجـه ابـاده
تسرح وتمرح في الغرف دايم الدوم
يجمع قروشـه ويتسلـف زيـاده
حتى يسافر مصر او ديـرة الـروم
او راح يم التـاي وتـرك بـلاده
ناظر جوازه ممتلـي كلـه ختـوم
دايم يسافـر مـا يعـرف العبـاده
يسكـر وينكـر و........ بالكـوم
وإلى رجـع يـروح يـم العيـاده
حيث ان فيده من فعايلـه مزكـوم
وإلى قعد مارس مع .......عـاده
حيثه مسيكينٍ مـن العرس محـروم
لـه موتـر خـرده كثيـر فسـاده
في كل يومٍ في الاشارات مصـدوم
غمارتـه تقـول ورشـه حـداده
ومريقده في شنطتـه دوم محـزوم
دوم يتنقـل تقـل كنـه جــراده
في كل يومٍ نازل لـه علـى قـوم
يسهر والى قام الظهر مـن رقـاده
روّح على شغله والى اليوم مخصوم
يذي بنات النـاس يبغـي مـراده
في كل يومٍ زاهمٍ له على ( هـوم )
اراه مايعـرس ويـقـدح زنــاده
يترك بنات الناس ويصير معصـوم
يلقـى هنـوفٍ تخدمـه مثـل داده
ويصير رجّالٍ ويسلـم مـن اللـوم
يفرح الى من قرب وقـت الـولاده
ويصير معنى العرس بالحيل مفهوم
يشـوف أولاده ومعهـم شـهـاده
قبل الوفاة وقولة النـاس مرحـوم