قصور الافراح

بنت اسبيع · 04-08-2006, 05:17 PM

قصر الافراح يرتبط اسمة دائما بالبهجة والأنشراح وليالية من الليالي الملاح ..اخواني لن اكمل لكم الموضوع على هذا النهج حتى ماتملون ابدخل في الموضوع بالعامية .
معظم المدعوين إلى قصر الأفراح من غير اهل العروسين يأتون إلى القصر بثقل طينة كل واحد منهم يقول بروح اوريهم وجهي وافتك ، طبعا في تلك السويعات (حلوة السويعات مادري شلون جت ) التي يجتمع بها المدعوين للزواج داخل القصر تدور الأحاديث بينهم كل واحد يبربر مع اللي بجواره (اقصد اللي جنبه) ترى ماهي تلك الأحاديث (السوالف) لاشك ان هناك ناس كثير ملاقيف وقلة عاقلين ودعونا نأخذ مادار بين العاقل والملقوف من سوالف داخل القصر وسنرمز لكل منهم بلقبه :
وصل الملقوف للقصر وبعد ان ادى السلام على الموجودين قام يتلفت يمين ويسار (طبعا كالعادة يبحث عن مقرب له ليجلس بجواره يبادله الحديث حتى يقطع الوقت ) بعد ان وجد ضالته الذي هو الشخص العاقل جلس جواره :
الملقوف / كيفك وشلونك عساك طيب وشلون الربع عسى ماخلاف ولامخالف يالله حيه وش اخبارك ؟
العاقل / بخير الله يسلمك .
الملقوف / تصدق والله مابغيت اجي بس استحيت قلت خلني اوريهم وجهي .
العاقل / ليش سلامات وش عندك ؟
الملقوف / والله شغيلات وارتباطات (يكذب ماعنده إلا الخرطي )
العاقل / الله يعين .
الملقوف / متى يقلطون العشا ؟ ماعاد إلا خير
العاقل / والله يابن الحلال مادري .
الملقوف / الله ينشبهم هم وعرسهم الساعة اللحين عشر .
العاقل / طول بالك .
الملقوف / منهو هالولد اللي يخفك رايح جاي ويرحب ؟
العاقل / اي واحد فيهم ؟
الملقوف / يارجال اللي لابس شماغ احمر ابو زقم طويل !!
العاقل / ايه هذا اخو المعرسة .
الملقوف / ياااااوك الله يعين المعرس كان المعرسة مثل اخوها .
العاقل / يارجال الله يوفقهم .
الملقوف / سمعت ان المعاريس بيسافرون هو صحيح ؟ (سامع الخبر من امه )
العاقل /يقولون انهم بيسافرون لسنغافورة .
الملقوف / امش سنغافورة مرة واحده !!! وش دراهم عن سنغافورة ؟ (ابعد مكان وصل له الملقوف الخفجي )
العاقل / ياخوي الله يوفقهم ويستر عليهم .
الملقوف / على فكرة الشايب اللي جالس قدامنا ولاف على عينه قزازة منهو ؟
العاقل / هذا ابو مسفر مسوي في عينة عملية ماء .
الملقوف / عساها الفقع تصدق انه اللي نضل بعير جارهم نضول هالشايب المعرعر.

فجأة انقطع حديثهم على صوت يقول تفضلو على عشاكم اقلطو .
العاقل يبي الفكة من هالملقوف لكنه لزق فيه وجلسو على احد الصحون وبعد ان انتهى العشا وخرجو من القصر وقفو بجوار بعض واخذ الملقوف يسال العاقل وهو ينقش اسنانه بعود اسنان قائلا :
شفت عشاهم ؟
العاقل / الحمدلله نعمة ليه وش فيه ؟
الملقوف / عشاهم مثل وجيههم الحلا قليل ولاحطو إلا ثلاث ذبايح وقعود بس !!!
العاقل / يابن الحلال نعمة والتبذير ماهو زين .
الملقوف / إلا وش ظنك يسويها المعرس الليلة ؟
العاقل / اقول عن اذنك انا ماشي تامر على شي ؟
الملقوف / سلامتك بس اللية وين بتروح ؟
العاقل / بروح انخمد بنام تعبان (يبي الفكة )

اعذروني ودي اكمل بس تعبت .

نقل من منتديات اسبيع

قانون الطاقة · 04-08-2006, 05:25 PM

هالملقوف لو ينشب بي هالنشبة

بأعطيه دولار وأقوله خذه ورحل لأبوي إسأله وش هالورقة

طبعا دقايق وأسمع صوت طراطيع الكفوف على وجه هالملقوف

هههههههههه أبوي بفباف الملاقيف هذولا ((فعال ويبيد بالحال))

<<<<إسألوه هههههههههههههههههههههههههه

اللورد · 04-08-2006, 08:22 PM

هههههههههه

الله يعين الناس على الملاقيف

والله لا يبلانا.

TARGET · 04-09-2006, 10:42 AM

خخخخخخخخخخخخخ حلوه منك السبيعيه فعلا في اشخاااص بهذه الصورة لكن ولله الحمد لم اواجه مثل هذا الشخص
انا اتمنى انه يجلس واحد من هذه النوعية مع قااانون الطاااقة ابيه يطلع ريحة قااانون

الله لا يبلانا
تحياااتي للجميع

mwanrs · 04-10-2006, 05:02 AM

سويعات= جمع ساعه
ساعه= جمع ذقيقة
ذقيقة = جمع ثواني
ثواني وارجع ثاني

فــهـد · 04-10-2006, 12:39 PM

بنت اسبيع

يعطيك العافيه

بس ذا الملقوف لو انه جنبي ذبحته من كثر بربرته

الله يعين ذا العاقل وش لون صبر

-----------------------------
الله يوفق كل مسلم

نواره · 04-10-2006, 09:26 PM

ههههههه والله صدق بزوااااجات في حريم كذا وانا صاااااااااااااااادفت الا متى العشااااااااااء تئخرو ولا العروس شينه المعرس احلى منه ولا العروس دبه المعرس احلى منه ولا العريس سمين احس ماايصلحون البعض وسواااااااااااااالف الله يعين

ابولينا · 04-10-2006, 09:28 PM

الله يعلم مايقولون والملائكه تسجل لاتخافون

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري